Beth yw Grant?

Mae Busnes Cymru yn disgrifio grant fel swm o arian a roddir i unigolyn neu fusnes ar gyfer prosiect neu ddiben penodol, sydd fel arfer ond yn cwmpasu rhan o’r gost lawn.  Gall grantiau fod yn gysylltiedig â gweithgaredd, creu cyflogaeth, neu ar gyfer sector penodol megis gofal plant a’r blynyddoedd cynnar. Mae rhai grantiau’n gysylltiedig ag ardaloedd daearyddol, megis ardaloedd sydd angen adnewyddiad economaidd. 

Cefnogaeth grantiau

Gall gwneud cais am grant helpu gyda chynaliadwyedd eich busnes, helpu i ddatblygu agwedd benodol ar eich busnes, neu helpu i ailosod eitemau sydd wedi torri neu dreulio. Gallai’r mathau o grantiau sydd ar gael ar gyfer lleoliadau gofal plant a’r blynyddoedd cynnar gynnwys:

• Grant cyfalaf
• Grant cynaliadwyedd
• Grantiau dechrau busnes
• Grantiau i ehangu'ch busnes

Yn gyntaf oll, dylech gysylltu â’ch Awdurdod Lleol (ALl) i weld pa gefnogaeth sydd ar gael. Mae hyn yn wahanol ar gyfer pob ardal, ond mae’n bosib y byddant yn gallu darparu cefnogaeth megis grantiau dechrau busnes, grant iechyd a diogelwch, grantiau cyfalaf bach ac arian ar gyfer adnoddau. Os byddwch yn cael eich hun mewn angen cyllid neu gefnogaeth o ganlyniad i sefyllfa benodol, e.e. Gorfod cau oherwydd brigiad o salwch neu argyfwng megis llifogydd, dylech gysylltu â’ch Awdurdod lleol i weld a oes help ar gael.

Busnes Cymru  

Mae Busnes Cymru yn darparu gwybodaeth am grantiau ynghyd â chanllawiau i’ch cefnogi gyda marchnata, sefydlu a thyfu’ch busnes. Gallwch gysylltu â nhw drwy ffonio 03000 6 03000 am gyngor unigol, gan y bydd yn dibynnu ar eich amgylchiadau.  Maen nhw hefyd yn darparu Canfyddwr Cyllid – gallwch ei ddefnyddio i chwilio am gyllid, cadw manylion penodol a chreu hysbysiadau ar gyfer cyllid a chefnogaeth i’ch busnes.  

Prif awgrymiadau ar gyfer ceisiadau grant

• Darllenwch y canllawiau​ a’r meini prawf cymhwyster
• Gwnewch i’ch cais edrych yn broffesiynol
• Peidiwch â bod yn ariangar – gofynnwch am yr hyn sydd ei angen arnoch yn unig.  
• Gofynnwch am arweiniad neu gymorth
• Disgrifiwch y buddion i’r plant ac i’ch busnes
• Gwerthwch y syniad o’ch lleoliad
• Cael syniad o’r costau
• Defnyddiwch luniau neu ddelweddau
• Prawf ddarllen 
• Cyflwynwch eich cais grant cyn y dyddiad cau

Cwblhau cais grant

Mae’n bwysig iawn bod ceisiadau grant yn cael eu cwblhau’n gywir. Gallai gwybodaeth sy’n anghywir neu ar goll arwain at oedi’r broses ymgeisio neu wrthod eich cais. Sicrhewch eich bod yn cwblhau pob adran a defnyddiwch y canllawiau i’ch cefnogi i wneud hynny. Os oes gennych chi unrhyw gwestiynau neu bryderon, sicrhewch eich bod yn gofyn am gymorth gan eich Awdurdod Lleol, PACEY Cymru a Busnes Cymru. Gallech hefyd ystyried cysylltu ag unrhyw leoliadau yr ydych yn ymwybodol eu bod wedi ymgeisio’n llwyddiannus am y grant ac a allai gynnig cefnogaeth a chyngor.

Sicrhewch eich bod yn darllen y cais cyn ei gyflwyno a bod yr holl wybodaeth yn gywir ac yn gyfredol. Rhaid cynnwys popeth y mae’r canllawiau yn gofyn amdano, gan gynnwys dogfennau cefnogol a thystiolaeth.

I wneud i’ch cais edrych yn broffesiynol, ystyriwch gynhyrchu cais wedi’i deipio y gellir ei gyflwyno’n electronig a chynnwys llythyr amgaeëdig wedi’i ddyddio gyda manylion cyswllt sy’n esbonio’n gyson sut wnaethoch eich penderfyniad a’ch dewis o ddeunydd/adnoddau.

Cyn i chi gyflwyno’ch cais, mae’n bwysig eich bod yn ei brawf ddarllen. Gallech hyd yn oed ofyn i gydweithiwr, ffrind neu berthynas i’w brawf ddarllen (ond byddwch yn ofalus am dorri cyfrinachedd).

Mae angen i chi sicrhau eich bod yn cyflwyno’ch cais mewn da bryd a chyn y dyddiad cau. Os byddwch yn anfon cais trwy’r post, ystyriwch ddefnyddio wasanaeth olrhain fel eich bod yn gwybod ei fod wedi cyrraedd ar amser. Os byddwch yn cyflwyno’n electronig, gofynnwch am dderbynneb darllen neu gadarnhad e-bost bod eich cais wedi cael ei dderbyn. Cofiwch, mae’n bosib bod rhai grantiau’n cael ei dyrannu ar sail y cyntaf i’r felin, felly sicrhewch eich bod yn cyflwyno’ch cais mewn da bryd.

Beth fydd yn cefnogi fy nghais?

Mae’n bwysig ystyried yn ofalus yr hyn rydych yn ymgeisio amdano. Bydd angen i chi ddangos ei fod yn bodloni meini prawf ac amcanion y grant, er enghraifft sut mae’n fuddiol i’r plant yn eich lleoliad neu sut fydd yn sicrhau cynaliadwyedd eich busnes yn y dyfodol. Sicrhewch y gallwch gyfiawnhau bod angen yr hyn rydych chi’n gofyn amdano yn eich lleoliad ac nid yw’n rhywbeth y dymunwch chi ei gael neu rydych wedi’i weld mewn lleoliad arall yn unig.

Wrth siarad am eich lleoliad a’ch cynlluniau, sicrhewch eich bod yn gwerthu’r syniad o’ch lleoliad. Disgrifiwch eich lleoliad, beth yw’ch amcanion, a pha mor hir rydych wedi bod yn rhedeg. Mae’n bwysig cynnwys gwybodaeth ar faint o blant sy’n defnyddio’ch lleoliad a’u hoedrannau. Os ydych wedi cael adborth gan blant neu eu rhieni/gofalwyr yn awgrymu newidiadau, cynhwyswch y wybodaeth hon hefyd.

Mae hefyd yn syniad da i ddefnyddio lluniau a delweddau i gefnogi’ch cais. Gall hyn roi mewnwelediad go iawn i’r Panel Grant o’ch lleoliad a’r cynlluniau sydd gennych am newidiadau yr ydych yn gobeithio eu gwneud yn y dyfodol.

P’un a ydych yn ymgeisio am adnoddau, offer neu welliannau i ardaloedd awyr agored, sicrhewch eich bod bob amser yn cynnwys costau cywir. Mae cael syniad o gostau a faint bydd angen arnoch yn bwysig iawn. Gwnewch ychydig o ymchwil ymlaen llaw a threuliwch amser yn ymweld â neu’n cysylltu â chyflenwyr i gadarnhau costau a gofyn cwestiynau.

Mae arweiniad hefyd ar gael ym Mhrif awgrymiadau Cwlwm ar gyfer ceisiadau cyllid llwyddiannus.

Canllawiau Grant Cyfalaf Gofal Plant a Blynyddoedd Cynnar 

Mae’n bosib y bydd lleoliadau gofal plant sydd wedi cofrestru ag Arolygiaeth Gofal Cymru (AGC) yn gymwys i wneud cais am Grant Cyfalaf Bach Gofal plant a Blynyddoedd Cynnar. Mae hyn yn cynnwys gwarchodwyr plant, darparwyr sector preifat a gwirfoddol, a lleoliadau a gynhelir sy’n cynnig gofal dydd, gofal cofleidiol, cynlluniau chwarae gwyliau, clybiau gofal plant y tu allan i’r ysgol ac ati. Gellir hefyd ystyried ceisiadau gan ddarparwyr gofal plant sydd yn y broses o ymgeisio am gofrestrai lle bo’r Awdurdod Lleol yn fodlon bod y darparwr yn wirioneddol yn y broses o wneud cais i AGC.

Mae’r grant hwn yn cefnogi datblygu a chynaliadwyedd lleoliadau gwarchod plant a blynyddoedd cynnar. Gallai gwmpasu gwella cyfleusterau awyr agored, offer ac adnoddau gan gynnwys offer TG, offer neu ddodrefn wrth fesur i ddiwallu plentyn ag anghenion dysgu ychwanegol, neu addasiadau ac offer i sicrhau y gall y gwasanaeth weithredu mewn ffordd sy’n ddiogel o ran Covid. Nid yw’n cwmpasu costau staff, dillad, biliau cyfleustodau, costau rhedeg na chostau yswiriant.

Bydd angen i chi gysylltu â’ch Awdurdod Lleol i ofyn am ffurflen gais a derbyn manylion ar sut i ymgeisio.  

Grantiau cynaliadwyedd

Gall cyllid grantiau cynaliadwyedd ddarparu cymorth ariannol byrdymor i leoliadau sy’n cael trafferth i gwrdd â’u costau rhedeg i’w helpu i ddod yn gynaliadwy. Yn aml byddant yn gofyn am gynllun busnes sy’n dangos y camau sy’n cael eu cymryd i fynd i’r afael ag anawsterau ariannol fel y byddant yn gallu cwrdd â’u costau rhedeg yn y dyfodol. Mae rhai awdurdodau lleol yn cynnig grantiau cynaliadwyedd o’r elfen Gofal Plant a Chwarae o’r Grant Plant a Chymunedau y maent yn ei dderbyn gan Lywodraeth Cymru i fynd i’r afael â bylchau yn eu Hasesiad Digonolrwydd Gofal Plant a/neu Asesiad Digonolrwydd Chwarae. 

Grantiau dechrau busnes

Gall cyllid grantiau dechrau busnes gefnogi gyda’r gost o ddechrau lleoliad newydd. Gallai hyn gynnwys cost hyfforddi, offer ac adnoddau, neu gael ei ddefnyddio ar gyfer costau rhedeg cynnar i helpu i sefydlu’r lleoliad newydd. Mae rhai awdurdodau lleol yn cynnig cyllid grantiau dechrau busnes ar gyfer lleoliadau gofal plant newydd gan gynnwys gwarchodwyr plant. Mae PACEY yn cynnig pecyn Cychwyn o Ansawdd ar gyfer gwarchodwyr plant newydd y mae rhai awdurdodau lleol yn cyllido gyda’u grant dechrau busnes. Mae’n bwysig darganfod beth sydd ar gael a’r broses ymgeisio cyn i chi ddechrau mynd i gostau.

Grantiau i ehangu’ch busnes

Gall cyllid grantiau helpu gyda’r gost o ehangu busnes. Yn dibynnu ar y math o leoliad a ffynhonnell y grant, gallai hyn gynnwys y gost o waith adeiladu, offer ac adnoddau, neu fynd tuag at gostau rhedeg ychwanegol megis cyflog am amser byr nes bod yn incwm yn tyfu digon i’w dalu. Os ydych yn bwriadu ehangu’ch busnes, mae’n bwysig darganfod pa grantiau sydd ar gael a’r broses ymgeisio a’r telerau ac amodau cyn i chi ddechrau mynd i gostau.